सडक अर्जुनीत शिक्षक- अधिकारी/कर्मचारी स्पर्धांना मोठी सुरूवात; गुणवत्तावाढ, नवोन्मेष आणि व्यावसायिक विकासाला नवा वेग!
सडक अर्जुनी=
शिक्षणातील गुणवत्ता वृद्धी आणि शिक्षकांच्या सातत्यपूर्ण व्यावसायिक विकासाला चालना देण्यासाठी राज्य शैक्षणिक संशोधन व प्रशिक्षण परिषद (SCERT), पुणे तर्फे 2024–25 या शैक्षणिक वर्षापासून राज्यभरातील शिक्षक, मुख्याध्यापक, शिक्षणाधिकारी तसेच कर्मचारी यांच्यासाठी विविध विषयाधारित स्पर्धांची महत्त्वाकांक्षी मालिका सुरू करण्यात आली आहे.
राष्ट्रीय शिक्षण धोरण 2020 च्या अनुषंगाने तयार करण्यात आलेल्या या स्पर्धांचा हेतू शिक्षकांमध्ये सर्जनशीलता, नावीन्यपूर्ण पद्धती, बहुआयामी कौशल्ये तसेच व्यावसायिक क्षमतांचा विकास साधणे हा आहे. विद्यार्थ्यांच्या समग्र विकासाला चालना देण्यासाठी विद्यालयस्तरापासून जिल्हास्तर आणि राज्यस्तरापर्यंत सर्वांनी सक्रिय सहभाग नोंदवावा, असे आवाहन करण्यात आले आहे.
SCERT संचालक राहुल रेखावार यांनी सांगितले की, “या स्पर्धांमुळे शिक्षकांच्या कार्यक्षमतेत वाढ होऊन शैक्षणिक गुणवत्तेला नवा आयाम मिळेल. प्रत्येक स्पर्धा ही शिक्षकांच्या नवकल्पना, समस्या निराकरण, अध्यापनातील उत्कृष्ट प्रयोग आणि सकारात्मक वातावरण निर्मितीला प्रोत्साहन देण्यासाठी आहे.”
राष्ट्रीय PQI निर्देशांक साध्य करण्यातही या स्पर्धांची थेट मदत होणार असल्याचे त्यांनी नमूद केले. शिक्षण क्षेत्रातील उज्ज्वल भविष्यासाठी ही स्पर्धा राज्याच्या सर्व शैक्षणिक विभागांसाठी एक महत्त्वपूर्ण संधी असल्याचेही त्यांनी स्पष्ट केले.
राज्यभरातील सर्व शिक्षक आणि शैक्षणिक कर्मचाऱ्यांनी या स्पर्धेत उत्साहाने सहभागी होऊन आपली कार्यकुशलता प्रदर्शित करावी, असे आवाहनही यावेळी शिक्षणअधिकारी लक्ष्मण चव्हाण यांनी केला आहे
