आमरण उपोषणाकडे प्रशासनाचे दुर्लक्ष?
उपोषणकर्ते महेंद्र वंजारी यांची प्रकृती अती गंभीर
सडक अर्जुनी | प्रतिनिधी
तहसील कार्यालयासमोर सुरू असलेल्या आमरण उपोषणाच्या ठिकाणी आतापर्यंत एकही प्रशासकीय अधिकारी भेट देण्यासाठी न आल्याने आंदोलनकर्त्यांमध्ये तीव्र नाराजी पसरली आहे. मागण्या पूर्ण होईपर्यंत उपोषण सुरू ठेवण्याचा निर्धार व्यक्त करण्यात आला असतानाच आता परिस्थिती गंभीर बनली आहे.
उपोषणात सहभागी असलेले महेंद्र वंजारी यांची प्रकृती अचानक खालावली असून त्यांची तब्येत अती गंभीर झाल्याची माहिती समोर येत आहे. उपोषणाच्या सलग दिवसांमुळे त्यांना अशक्तपणा, चक्कर येणे आणि रक्तदाबातील चढ-उताराचा त्रास होत असल्याचे सहकाऱ्यांनी सांगितले. वैद्यकीय उपचारासाठी त्यांना तातडीने रुग्णालयात हलवण्याची मागणी करण्यात येत आहे.
दरम्यान, प्रशासनाने अद्याप कोणतीही अधिकृत भूमिका जाहीर केलेली नसून अधिकारी उपोषणस्थळी न आल्याने नागरिकांमध्ये संताप व्यक्त केला जात आहे. “एखाद्या व्यक्तीची प्रकृती गंभीर होत असताना प्रशासन शांत का?” असा सवाल आंदोलनकर्त्यांकडून उपस्थित केला जात आहे.
परिस्थिती आणखी बिघडू नये यासाठी तात्काळ चर्चा करून तोडगा काढण्याची मागणी होत आहे. आता प्रशासन काय पाऊल उचलते, याकडे संपूर्ण तालुक्याचे लक्ष लागले आहे.
