अवैध उत्खननाविरोधात सडक अर्जुनी महसूल प्रशासनाची प्रभावी कारवाई
8.52 लाखांची दंडवसुली
सडक अर्जुनी, प्रतिनिधी :
तहसील कार्यालय सडक अर्जुनी अंतर्गत अवैध गौण खनिज उत्खनन व वाहतूक रोखण्यासाठी महसूल प्रशासनाने प्रभावी आणि सातत्यपूर्ण कारवाई करत उल्लेखनीय यश मिळविले आहे. तहसीलदार आनंद जाधव यांच्या मार्गदर्शनाखाली विशेष पथकांच्या माध्यमातून ही कारवाई करण्यात आली.
प्राप्त माहितीनुसार, आर्थिक वर्ष 2025-26 दरम्यान अवैध वाळू उत्खननाच्या 36 प्रकरणांवर कारवाई करण्यात आली असून त्यातून ₹5,87,565 इतकी दंडवसुली करण्यात आली आहे. तसेच अवैध माती व मुरूम उत्खननाच्या 9 प्रकरणांवर कारवाई करत ₹2,65,235 इतकी दंडवसुली करण्यात आली आहे.
या सर्व कारवायांमधून प्रशासनाने एकूण ₹8,52,800 इतकी दंडवसुली केली असून अवैध उत्खननावर प्रभावी नियंत्रण आणण्यात प्रशासनाला यश आले आहे.
तहसीलदार आनंद जाधव यांनी सांगितले की, अवैध उत्खननामुळे पर्यावरणाची हानी होत असून महसूलाचे नुकसानही होते. त्यामुळे अशा प्रकारांना आळा घालण्यासाठी प्रशासन सतत दक्ष असून भविष्यातही अशा कारवाया सुरू राहणार आहेत.
या प्रभावी कारवाईमुळे अवैध उत्खनन करणाऱ्यांमध्ये भीतीचे वातावरण निर्माण झाले असून नागरिकांकडून महसूल प्रशासनाच्या कामगिरीचे कौतुक करण्यात येत आहे. तसेच नागरिकांनीही अवैध उत्खननाची माहिती प्रशासनाला देऊन सहकार्य करावे, असे आवाहन तहसीलदार आनंद जाधव यांनी केला आहे.
