महिला बचत गटांना आर्थिक बळ! शेंड्यात १८ समूहांना ८९ लाखांचे कर्जवाटप
‘सेवा संकल्प अभियानांतर्गत नवदुर्गा कर्ज वितरण मेळावा’; महिलांच्या आर्थिक स्वावलंबनाला मिळणार चालना
सडक अर्जुनी | प्रतिनिधी
महिला बचत गटांना आर्थिकदृष्ट्या सक्षम करून त्यांच्या स्वावलंबनाला चालना देण्याच्या उद्देशाने समृद्ध महिला प्रभागसंघ, शेंडा यांच्या वतीने १६ ऑक्टोबर २०२६ रोजी ‘सेवा संकल्प अभियानांतर्गत नवदुर्गा कर्ज वितरण मेळाव्या’चे आयोजन करण्यात आले. या मेळाव्यात बँक ऑफ बडोदा (BOB), शाखा बाम्हणी यांच्या वतीने एकूण १८ महिला बचत गटांना ८९ लाख रुपयांचे कर्ज वितरित करण्यात आले.
महिला बचत गटांच्या माध्यमातून ग्रामीण भागातील महिलांना आर्थिक व्यवहारांची संधी उपलब्ध करून देणे, स्वयंरोजगाराला प्रोत्साहन देणे आणि त्यांना आर्थिकदृष्ट्या स्वयंपूर्ण बनविणे, या दृष्टीने हा मेळावा महत्त्वपूर्ण ठरला. कर्जाच्या माध्यमातून महिलांना लघुउद्योग, व्यवसाय तसेच उपजीविकेच्या विविध साधनांना बळकटी देण्याची संधी उपलब्ध होणार आहे.
या मेळाव्याला बँक ऑफ बडोदा, बाम्हणीचे शाखा व्यवस्थापक लोकेश उपरीकर, तालुका अभियान व्यवस्थापक अतुल मुटकुरे, नितीन धोटे, प्रभाग समन्वयक लिभाष घरडे, नितेश पराते, बँक सखी प्रीती ठाकूर, FLCRP जागेश्वरी गणवीर तसेच कॅडर यांचे सहकार्य लाभले.
१८ बचत गटांना मिळालेल्या ८९ लाख रुपयांच्या कर्जामुळे ग्रामीण महिलांच्या आर्थिक सक्षमीकरणाला चालना मिळण्याची अपेक्षा व्यक्त होत आहे. महिला बचत गटांच्या माध्यमातून आर्थिक विकासाची संधी निर्माण करण्यासाठी अशा उपक्रमांचे महत्त्व अधोरेखित होत आहे.
