गोंदिया पोलिसांसमोर ११ नक्षलवाद्यांचे आत्मसमर्पन
गोंदिया : नक्षलवाद निर्मूलन मोहिमेला गोंदिया पोलिसांनी मोठे यश मिळवले आहे. महाराष्ट्र–मध्यप्रदेश–छत्तीसगड (एमएमसी) क्राइम कंट्रोल स्पेशल ऑपरेशन अंतर्गत एकूण ११ नक्षलवाद्यांनी गोंदिया पोलिसांसमोर शस्त्रांसह आत्मसमर्पण केले. पोलिस अधीक्षकांच्या मार्गदर्शनाखाली राबविण्यात आलेल्या सातत्यपूर्ण पाठपुरावा, जनजागृती, विश्वास संपादन अभियानामुळे ही मोठी कारवाई शक्य झाली.
आत्मसमर्पण करणाऱ्यांमध्ये विविध पथकांतील ACM, तांत्रिक टीम सदस्य, मिलिशिया सदस्य, LOS व CNM कार्यकर्त्यांचा समावेश आहे. काहींच्या ताब्यातून SLR रायफल, देशी रायफल, कारतूस आणि नक्षल साहित्य जप्त करण्यात आले. आत्मसमर्पण धोरणानुसार प्रत्येकीला २ ते ५ लाख रुपयांपर्यंतचे अनुदान मिळणार आहे.
स्थानिक सीमाभागात २००५ पासून सक्रिय असलेले हे नक्षलवादी अलीकडील काळात सततच्या पोलिस दबावामुळे, विकासकामांमुळे आणि ग्रामस्थांच्या बदललेल्या भूमिकेमुळे मुख्य प्रवाहात येण्याचा निर्णय घेतल्याचे पोलिसांनी सांगितले.
गोंदिया पोलिसांच्या या कारवाईमुळे जिल्ह्यात शांततेचा नवा संदेश गेला असून, शासनाच्या पुनर्वसन योजनेचा लाभ घेऊन सर्वांनी सामान्य जीवन जगावे, असे आवाहन पोलिस अधीक्षक कार्यालयाकडून करण्यात आले आहे.
